粵音朗讀測試 (CRAT)

測試介紹

粵語係香港95%人口日常使用嘅語言。要融入香港社會，必須掌握粵語。除日常口語外，粵語亦適用於較正式嘅語體（例如新聞廣播）。香港嘅高階粵語使用者，應能使用粵語準確讀出繁體中文字，以應付各種語體所需。

現時坊間並無相關測試可檢定測試者嘅粵音朗讀水平，粵音朗讀測試（Cantonese Read-aloud Test，簡稱CRAT）正係為咗填補呢個空缺，為有需要人士提供水平認證。

對象

歡迎所有希望取得相關認證嘅人士參加，包括但不限於從事教育、傳媒等行業嘅人士，或有意了解自己粵音朗讀水平嘅母語人士或粵語學習者。

測試範圍

本朗讀試測試評核考生使用香港粵語朗讀嘅 ⑴ 流暢度、⑵ 口音純度，以及 ⑶ 準確度。測試分三個部份，分別要求考生朗讀單字（甲部）、多音節詞彙（乙部）同篇章（丙部）。考試範圍已載於本頁。

測試流程

測試分為三部份：甲部為單字；乙部為多音節詞彙；丙部為篇章。

測試開始前，考生會有4分鐘時間準備。工作人員將依次展示丙部嘅兩道試題，試題上印有篇章嘅漢字同相應粵拼。每道試題限時閱讀2分鐘。準備時間結束後，測試隨即開始。首先，考生朗讀考生編號、姓名。其後，工作人員會依次展示甲、乙、丙三部份嘅試題；考生見到試題後，即開始朗讀試題（毋須朗讀題號及標題）。

各部份嘅朗讀均設時間上限，超出時限嘅錄音將不作評分。時限如下：甲部2分鐘；乙部2分鐘；丙部〔粵文〕2分30秒；丙部〔香港中文〕2分30秒。喺整個測試過程中，工作人員嘅口頭指示均使用粵語。

測驗守則

測驗期間，考生須遵守以下守則：

不得查閱書籍或筆記
不得騷擾其他考生
不得與工作人員以外的人士交談
不得使用通訊設備，網上測試亦只能使用維持視像會議的通訊設備
不得使用耳機，網上測試亦同
實體測試須按工作人員的指示就座
網上測試必須一直在攝像頭前清楚展示自己的相貌

評分

為確保測試評分公平、公正，每位考生喺每個部分嘅朗讀表現都會交由至少兩名考官進行評分。若出現評分不一致，則會安排第三名考官評分。如有需要，個案會呈交至專家小組，由多位相關領域嘅專家商討仲裁。由於覆核評分成本高昂，現階段不接受成績覆核申請。

常見問題 FAQ

Q1：喺粵音朗讀測試中何謂「正確讀音」？

粵音朗讀測試所接受的讀音以社會廣泛接受為標準，不盲目跟從字典讀音。考生可參考本會粵音朗讀測試的附錄二 (多音節詞彙表)、附錄三（香港中文篇章）、附錄四（粵文篇章）中的標音。例子︰

時「間」不應讀成時「奸」(gaan1)
花「貓」不應讀成花「苗」(miu4)
「孩」子不應讀成「hoi4」子
「朱古力」應讀作「zyu1 gu1 lik1」，而非「zyu1 gu2 lik6」

對於幾項較新的粵音變異，在粵音朗讀測試的處理方式如下：

接受 n- 讀為 l-。
- 例︰女 – neoi5 / leoi5 都可接受。
- 不過， l- 誤讀為 n- 會視為準確度的失誤。
接受 ng- 與零聲母合流。
- 例︰我 – ngo5 / o5 都可接受。
- 例︰愛 – oi3 / ngoi3 都可接受。
不接受 -n / -ng 合流。
- 例︰恆生 hang4 sang1；痕身 han4 san1。
不接受 -t / -k 合流。
- 例︰百八 baak3 baat3；八百 baat3 baak3。
不接受 gw-, kw- / g-, k- 合流。
- 例︰各家 gok3 gaa1；國家 gwok3 gaa1。
- 例︰曠世 kwong3 sai3；抗世 kong3 sai3。

另外，發音過份造作會視為口音純度嘅失誤。

Q2：在粵音朗讀測試朗讀香港中文篇章時，應否翻譯為粵語？

不應翻譯。例如「我們的」應該讀作 ngo5 mun4 dik1，不應該讀成「我哋嘅」。

Q3: 粵音朗讀測試中，回讀會影響我的成績嗎？

甲部（朗讀單字）、⼄部（朗讀多⾳節詞彙）
- 可以更正（以最後一次發音為準）
- 但不能在朗讀下個字詞後回讀。
丙部（朗讀篇章）
- 可以更正
- 但會影響流暢度評分。

Q4: 粵音朗讀測試對於篇章嘅朗讀流暢度評級會考慮乜嘢因素？

影響流暢度評級嘅因素包括但不限於以下各項：

冇回讀
適當嘅語速
適當嘅句子節奏同停頓
語調並非一成不變
詞語嘅斷連正確
重讀與輕讀位置正確

Q5：點解兩張粵音朗讀測試嘅證書所列的細項評級完全相同，但總成績評級唔一樣？

證書上所顯示嘅各項評級並未明確列示子級評級（subgrade），但喺總成績計算過程中，子級評級會被納入考量。例如，若某項評級為A-或A+，喺證書上均顯示為A，但根據此評級計算嘅總成績可能會有所不同。

Q6：如何核實粵音朗讀測試證書嘅真偽？

本會為兩年內簽發的粵音朗讀測試證書提供資料核實服務。如有需要，請以電郵向本會查詢，郵件須附上希望核實資料之證書副本。每次核實收費港幣 150 元正，每次最多可核實 4 份證書嘅資料。

Q7：學會能否為我嘅朗讀表現提供指導？

就粵語發音及朗讀的個人化指導，請查詢坊間提供粵語培訓嘅機構，包括各大學轄下語言學習中心等。本會主要提供評核服務，培訓與指導方面嘅服務因資源所限及角色衝突等各種考慮，現階段未能提供。

Q8：粵音朗讀測試對考生是否設有年齡限制？

粵音朗讀測試不設年齡限制，但未滿十八歲人士報考本測試必須經家長同意。喺測試過程中，考生須出示有效身份證明文件以供核實身分，且必須有能力理解並遵循書面（漢字）及口頭（粵語）上嘅測試指引。如果網測，較年幼嘅考生可以由家長協助設定視像通話設備（Zoom），惟本會無法為較年幼嘅考生提供額外技術支援。

Q9：如何安裝、下載、使用 Zoom 進行網測？

測試開始前兩日內，考生會收到測試 Zoom 連結，考生毋須密碼，亦毋須安裝 Zoom 客户端即可用 Zoom 網頁版進入考試。但為咗保證測試流暢進行，建議提前測試 Zoom 確保連接暢通。

因所在地限制無法使用 Zoom 嘅考生須自行解決網絡技術問題，本會無法提供協助。如果考試當日未能加入考試嘅 Zoom 會議或遲到 10 分鐘以上，當缺席論。

Q10：點解唔接受 @qq.com 郵箱報名？

因過往多位考生反映郵件被攔截、拒收等問題，本會拒絕接受 @qq.com 郵箱報名，且建議避免使用 @126.com、@163.com 等中國大陸郵件提供商。此類郵件提供商會自動隨機攔截、屏蔽中國境外郵件。推薦使用 @gmail.com、@outlook.com、@yahoo.com、@icloud.com 或 @protonmail.com 等郵址。如因郵件服務商限制而導致嘅通訊失敗（無法收到證書、考號、測試 Zoom 連結等），本會恕不負責。

Q11：測試結束後幾耐會收到證書？

證書將於測試結束後 3 個月內寄出。證書正式寄出前，考生會收到一封電郵確認信，內含電子版證書，考生可選擇是否放棄紙質證書。如選擇放棄紙質證書，中國大陸地區考生則免付順豐郵費。

Q12：點解唯有中國大陸地區考生需要另付順豐郵費寄送證書？

因過往多位考生反映，中國大陸地區平郵證書經常寄失，本會限中國大陸地區使用順豐到付寄送證書作為可靠寄送方式。

考試準備材料

(僅提供中文版)